ნაჰაპეტ ქუჩაკი XIII – XIV ს.ს. სომეხი პოეტია, საქვეყნო პარნასის აღიარებული მკვიდრი.
მისი ბიოგრაფიული მონაცემები იმდე- ნად მწირია და სავარაუდო, რომ ისიც კი, რაც ვიცით, ისევ მისივე შემოქმედებიდანაა მოძიებული.
წარმოიდგინეთ, ამ დიდი ლირიკოსის გვარ-სახელიც კი პირობითია.
ადრე ასეთი ვარაუდიც კი არსებობდა, თითქოს იგი, XVI საუკუნის პოეტი, წარმოშობით ვანის ტბის ახლომდებარე დაბა ხარაკონისიდან უნდა ყოფილიყო, მაგრამ მეცნიერთა ფილოლოგიურმა და ენათმეცნიერულმა კვლევებმა იგი უფრო ადრინდელ შემოქმედად მიიჩნია.
თავიდან კი პოეტის ჰაირენები (სალექსო ფორმაა ასეთი) ხალხური ეგონათ, თუმცა არც ამგვარი აზრის უარყოფა გაძნელებულა, რადგან ქუჩაკის პოეტური ხელწერა ერთ ავტორს უფრო გულისხმობს.

იგი ზეციერიცაა და მიწიერიც... და, რაც მთავარია, მისი პოეზია ისეთ ადამიანურ განცდებთანაა წილნაყარი, რაც იყო, არის და იქნება აწ და მარადის უკუნითი უკუნისამდე.

გივი შაჰნაზარი