Описание

2012 წელს ლიტერატურის მუზეუმს თათული ღვინიაშვილმა გადმოსცა მწერალ ანა ღვინიაშვილის არქივი. ამ არქივში აღმოჩნდა მარო მაყაშვილის ჩანაწერების ახალი, დღემდე დაკარგულად მიჩნეული, რვეული. რუსეთის წითელ იმპერიასთან ბრძოლაში დაღუპული 19 წლის მოწყალების და – მარო მაყაშვილი საქართველოს თავისუფლებისათვის ბრძოლის ერთ-ერთი სიმბოლური ფიგურაა. მარო მაყაშვილის დღიურები გადმოგვცემს საქართველოს ხანმოკლე დამოუკიდებლობის პერიოდს. საინტერესოა ახალგაზრდა ადამიანის მოვლენების ხედვა, ზოგჯერ რადიკალური შეფასებები, ყოველდღიური ცხოვრების მომენტები, ოცნებები და იმედები, რომლებსაც ახდენა არ ეწერათ. მარო მაყაშვილი მტრის ყუმბარამ მოკლა კოჯორთან 19 თებერვალს. 23 თებერვალს ის თბილისში, რუსთაველზე, სამხედრო ტაძრის ეზოში, საძმო საფლავში დაკრძალეს რუსეთთან ომში დაცემულ მეომრებთან ერთად. მარო მაყაშვილის დღიურების აქამდე ცნობილი ნაწილი პირველად არჩილ სულაკაურმა გამოაქვეყნა ჟურნალში „მნათობი“ 1996 წელს, პატარა წიგნაკად კი – ლიტერატურის მუზეუმმა გამოსცა 2004 წელს. სამწუხაროდ, გამოცემაში ტექსტი დაბეჭდილია კუპიურებით და ზედმეტად რედაქტირებულია, არ არის შეტანილი დღიურში არსებული ჩანახატები და გაზეთიდან ამონაჭერი. წინამდებარე გამოცემა მკითხველს სთავაზობს მარო მაყაშვილის დღიურს სრული სახით, ავტორის დამახასიათებელი სტილისა და ორთოგრაფიის დაცვით.