ბასკები! საიდან მოვიდნენ ისინი? საუკუნეთა მანძილზე მრავალი ქვეყნის გამოჩენილი მეცნიერი იმტვრევდა თავს ამ საიდუმლოებით მოცულ პრობლემაზე. ეს პრობლემა დღესაც აქტუალურია და უდიდეს მეცნიერულ ძიებას მოითხოვს, რაც უფრო მეტს ვიგებთ ამ ხალხზე, მით უფრო მეტი კითხვა იბადება, მით უფრო ხშირად ვაწყდებით გასაოცარ დამთხვევებს ბასკებისა და კავკასიის ხალხთა ენასა, ყოფასა და ისტორიაში.

ალექსანდრე კიკნაძის რომანი „იბერიის ლეგენდა“, რასაკვირველია, მიზნად არ ისახავს ამ რთული პრობლემის გადაწყვეტას, ესაა ცხოვრება ქართველი ჭაბუკისა, რომელმაც მჭიდროდ დაუკავშირა თავისი ბედი მისი სამშობლოდან მოშორებით მცხოვრებ ხალხს და მათი ისტორიის შესწავლას. რომანის მთავარი იდეა ბასკთა პრობლემა ფანტასტიკის სფეროშია გადატანილი.