როგორ წარმოიშვა, რა კანონებით ვითარდება სამყარო, სიცოცხლე, ადამიანი, მისი კულტურა? კაცობრიობისათვის სასიცოცხლო მნიშვნელობის ეს კითხვები ადამიანების მრავალ თაობას არ აძლევდა მოსვენებას. ერთნი პასუხების ძიებისას თანამედროვე მეცნიერების მიღწევებით არიან შთაგონებულნი; სხვანი ჭეშმარიტებას ჩვენი წინაპრებივით ღმერთს უკავშირებენ; ზოგს კი მიაჩნია, რომ ადამიანი, მისი კულტურა და ცივილიზებული კაცობრიობა უცხოპლანეტელებმა, თავისებურმა “ღმერთებმა” შექმნეს. მათი აზრით, კაცობრიობის განვითარება ციკლური, არათანამიმდევრული იყო, რადგან უძველეს დროში არსებობდა მაღალგანვითარებული ტექნიკის ცივილიზაციები, რომლებიც საკონტინენტთაშორისო, უფრო მეტიც, საპლანეტთაშორისო ომების ან საშინელი ბუნებრივი კატაკლიზმების შედეგად განადგურდნენ. ამ წიგნში შეძლებისდაგვარადაა თავმოყრილი ცნობები იმ ფაქტებზე, ანუ დედამიწაზე დღემდე შემორჩენილ ლეგენდებზე, მითებზე, ნაგებობებზე, საკულტო საგნებზე, ხელოვნების ნიმუშებზე, რომლებსაც კაცობრიობის განვითარებაში უცხოპლანეტელების მონაწილეობის (არქეოასტრონავტული) თეორიის მიმდევრები თავიანთი მოსაზრებების დასამტკიცებლად იყენებენ. აქ გაეცნობით საქვეყნოდ ცნობილი მეცნიერების იდეებს, მათი შრომის შედეგებს, ძიების მეთოდებს. ბევრი მათგანი შეიძლება აჭარბებდეს, ცდებოდეს, ერთი შეხედვით არამეცნიერულად მსჯელობდეს, მაგრამ ფაქტი ერთია - ყველაფერი, რაზედაც საუბარი გვექნება, ჩვენს პლანეტაზე რეალურად არსებობს, მოითხოვს უფრო ღრმა, საფუძვლიან შესწავლას და იქნებ, ბოლოსდაბოლოს, მართალნი აღმოჩნდნენ ისინი, ვინც კაცობრიობის ბედ-იღბალს უცხოპლანეტელებს უკავშირებს.