წინამდებარე სამეცნიერო-პოპულარული ნაშრომი ეძღვნება მსოფლიოს ერთ-ერთი უძველესი ცივილიზაციის შემქმნელ ხალხს - ხეთებს, რომლებიც ძვ. წ. II ათასწლეულში ცხოვრობდნენ მცირე აზიის (ანატოლიის) ცენტრალურ ნაწილში (თანამედროვე თურქეთის ტერიტორიაზე).
ნარკვევში მოთხრობილია ხეთების აღმოჩენის ისტორია, განხილულია ხეთური ეთნოსის ჩამოყალიბების საკითხი, ხეთების სამეფოს პოლიტიკური და სოციალურ-ეკონომიკური განვითარების ეტაპები, ხეთების რელიგიურ შეხედულებათა სისტემა, ხეთური კულტურის საკითხები. საუბარია უძველეს ენობრივ, რელიგიურ, კულტურულ კონტაქტებზე, რომლებსაც ადგილი უნდა ჰქონოდათ ძველ მცირე აზიასა და სამხრეთ ამიერკავკასიაში მცხოვრებ ტომთა შორის.